بھارت میں کورونا،انضمام الحق نےنجات کا آسان حل بتادیا

رپورٹ : عمران عثمانی

بھارت میں کوروناکی وجہ سے حالات خاصے خراب ہیں،پاکستان کے موجودہ کپتان بابر اعظم،سابق کرکٹرز شعیب ملک اور شعیب اختر بھی اس پر بات کرچکے ہیں،بدھ کے روز سابق پاکستانی کپتان انضمام الحق نے بھی اس پر لب کشائی کی ہے اور کہا ہے کہ بھارت بھی ہمارے لئے اہم ہے،میں نے اپنی جتنی کرکٹ کھیلی ہے،اس میں مجھے سب سے زیادہ مزا بھارت میں کھیلنے سے آیا ہے.

انضمام نے اپنے آفیشل یوٹیوب چینل پر کہا ہے کہ اس سے قبل بڑی بیماری طاعون آئی تھی،احتیاط اپنی جگہ لیکن وہ توبہ تائب سے گئی تھی،اب میں اہم بات یہ کروں گا کہ اگر ہم بری حرکتیں اور نافرمانی کی چیزیں چھوڑ دیں تو یہ کوروناکی بیماری چلی جائے گی،میں پاکستان اور بھارت دونوں کی بات کر رہا ہوں،اللہ پاک ہم دونوں کی حفاظت کرے لیکن ہمارے معاشرے میں جو بری چیزیں ہیں،نافرمانیاں چل رہی ہیں،ان سے واپسی کی جائے تو یہ بیماری ختم ہوجائے گی.

انضمام نے مزید کہا ہے کہ اللہ تعالیٰ کی طرف سے بیماری چلی جائے گی لیکن اس سے سیکھنے والی بات یہ ہے کہ یہ بیماری کسی کو بھی لگ سکتی ہے،ہمارا تعلق اچھا ہونا چاہئے،پاکستان اور بھارت کے لوگ ایک دوسرے سے پیار کریں،ایک دوسرے کی مدد کریں،بری چیزوں سے دور ہونا چاہئے،یہ اوپر والے کی طرف سے بیماری آئی ہے،اس کی ماننے میں خیر ہے،اور اس کا سب سے بڑا حکم یہ ہے کہ کسی سے برا سلوک مت کرو،سب پر رحم کریں،ایک دوسرے کے ساتھ اچھائی کریں،صاحب حیثیت لوگ دوسروں پر لگائیں.

انضمام کہتے ہیں کہ میری بھارت سے اچھی یادیں وابستہ ہیں،ان کے اور ہمارے کرکٹرز ایک فیملی کی طرح ہیں،یہ بھارتی کرکٹرز بھی سامنے آئیں اور لوگوں کی مدد کریں،اس سے دوسروں میں جذبہ پیدا ہوگا،میں بھارت سے اس لئے بھی قریب ہوں کہ پاکستان بھارت کے میچز کھیلنے کا مزا بھی اپنا ہے اور مجھے بھارت میں عزت اور پیار بھی خوب ملا ہے.